Afmælismyndavídeó og nýjar myndir

Þá er kéllingin stungin af enn eina ferðina í námsferð, og við kallarnir erum skildir eftir heima... og þá er loksins bloggað, reyndar er þetta svona næturblogg eins og hjá Össuri en ég ætla ekkert að reyna að feta í fótspor hans í efnistökum og orðaleikjum.

Ég ætlaði nú bara aðallega að tilkynna nýtt myndaalbúm, 12-13 mánaða og svo fylgir þessari færslu smá vídeóstubbur úr afmælismyndunum.

12 til 13 mánaða

Freyr veiktist fljótlega eftir afmælið, fékk fyrst ælupest og niðurgang og svo hita í kjölfarið á því. Ætli þetta hafi ekki tekið hátt í 2 vikur allt í allt. Amma hans kom frá Vopnafirði og hjálpaði til við pössun svo þetta gekk allt upp að lokum.
En nú er Freyr eitthvað farinn að kvarta yfir þessu næturbrölti mínu, þannig að það er sennilega réttast að láta þetta duga í bili.

Það eru komnar inn afmælismyndir

Eins árs

Já, þá er drengurinn orðinn eins árs.

Við héldum 2 veislur, á sunnudaginn fyrir börnin og svo á þriðjudaginn, afmælisdaginn sjálfan fyrir ömmur og afa. Þetta heppnaðist bara í alla staði vel, drengurinn fékk fullt af góðum gjöfum og ég held að flestir hafi fengið nægju sína af bakkelsi.

Annars er það helst að frétta af stráknum að nú æfir hann sig stíft að ganga og er bara að verða nokkuð lunkinn við það. Hann er farinn að velja það frekar að labba styttri leiðir en að skríða svo þetta er allt að koma. 2 tennur bættust við rétt tímanlega fyrir afmælið svo nú eru þær orðnar 4, 2 í neðri góm og 2 í efri góm.

Í kvöld ætlar mamman svo að stinga okkur feðga af til að fara í starfsþjálfun til Hafnar í Hornafirði ! Þetta er hluti af náms- og starfsráðgjafanáminu en mér finnst þetta alveg ótrúlegt að hægt sé að bjóða mönnum upp á þetta, ég sé fyrir mér að Reykvíkingar myndu láta bjóða sér að fara til Akureyrar í starfsþjálfun! En það virðist vera frekar fátæklegt úrval hér fyrir austan af fyrirtækjum og/eða stofnunum sem geta tekið að sér nema í þessu fagi. En við fáum nú vonandi húsmóðurina aftur heim annað kvöld.

Í síðustu viku var dagmömmuvesen á okkur, dóttir dagmömmunnar veiktist og var "sjoppunni" lokað á meðan, við náðum þó að greiða úr því með hjálp fjölskyldu og vina. Þessa vikuna er Freyr svo búinn að vera til 4 á daginn hjá dagmömmu og virðist það ganga ágætlega.

Setti inn myndir um daginn frá "stúdíó"myndatöku af Frey í desember, það raðast aðeins aftar en nýjustu myndirnar í röðina en eru margar hverjar alveg þess virði að skoða þær.

Húskofarnir í Reykjavík

... og fyrst ég er kominn í gírinn, 3 blogg á einu kvöldi ættu að halda dyggum lesendum í losti næstu mánuði þannig að það liggur ekkert á næsta skammti.

Óskaplega geta menn verið viðkvæmir fyrir þessum húskofum á Laugaveginum, mér virðast þetta bara vera gamlir hjallar sem eru engum til gagns og eru bara fyrir. BDSM bandalagið (Björn, Dagur, Svandís, Margrét) sem ræður víst ríkjum í borginni þessa stundina, ætlaði að fá að flytja þetta í burtu og byggja þetta upp annars staðar það er nú jafnvel enn verra en að láta þetta standa á sínum stað.
Auðvitað verður að finna milliveg á milli þess að rífa allt og vernda allt en ég held að það sem höfuðborgin okkar þarfnast sé nútímalegri miðbær. Loka laugaveginum frá Snorrabraut og niðurúr og gera að göngugötu, rífa hjallana og byggja ný smekkleg hús (ekki of há) sem standast byggingareglugerðir þessarar aldar - eða a.m.k. þeirrar síðustu.

... en ég hef svo sem ekkert vit á þessu.

Facebook og Myspace

Hef verið spurður að því af hverju ég sé horfinn af Facebook.
Við því er einfalt svar. Fyrir nokkru bauð mér maður nokkur í "my extended family" að vera vinur sinn á facebook, jú jú mér líkaði svo sem ágætlega við þann mann ... þá !
Svo vatt þetta uppá sig, vinir vina manns vildu vera vinir manns, ættingjar hentu í mann rollum, ég gaf einhverjum mörgæs ... allt svakalega spennandi ... eða þannig. Ég lagði nú ekkert sérstaklega mikið upp úr því að hanna prófílinn minn en smám saman hlóðst inn á hann allskonar svona rusl um fólk potandi hvort í annað og kastandi rollum. Fljótt varð þetta svo yfirþyrmandi að ég fékk magaverk og hjartsláttartruflanir í hvert skipti sem ég slysaðist til að opna þessa hörmung.
Ég ætlaði að tilnefna facebook sem ljótasta og óþarfasta fyrirbæri í netheimum en í kvöld rambaði ég inn á myspace síðu ... úff púff ... fésbókin leit bara út fyrir að vera mjög fallegt og gagnlegt tól í þeim samanburði.

HEFUR FÓLK VIRKILEGA EKKERT ÞARFARA AÐ GERA ???????

Ég vona að vinir mínir og ættingjar sem reynt hafa að henda í mig rollum og öðru lauslegu í trausti þess að það geti talist góð leið til að "vera í sambandi" fyrirgefi mér þetta óþol á tengslasíðum, en ég er búinn að komast að því að þær eru ekki minn tebolli.

Vinsamlegast ekki pota í mig !

Kveðja Fýlupokinn Sv1

Næstum farinn að ganga

Freyr æfir sig nú stíft að ganga og er bara orðinn nokkuð góður - dettur ekki oft en fer svo sem ekki langar leiðir - en þó kannski 5-10 skref í einu.

Við feðgar erum einir heima, sendum mömmuna í skóla til Reykjavíkur þar sem hún lærir ábyggilega eitthvað gagnlegt. Okkur kemur ágætlega saman þó svo að Freyr virðist nú sakna mömmu sinnar svolítið. Mamman skilar sér svo vonandi aftur um helgina.

Bíllinn okkar er búinn að vera að stríða okkur, tók upp á því á milli jóla og nýárs að fara að ganga illa. Ég hökti á honum upp í Hérað á þriðjudaginn á verkstæði og þóttust þeir vera búnir að finna það út í dag að vandamálið hefði verið bilað háspennukefli. Ég vona að það hafi verið málið og hann verði betri en nýr eftir þetta.

Setti inn slatta af nýjum myndum í gærkvöldi, njótið vel.

Gleðilegt ár 2008

Jæja þá er komið árið 2008. Skrítið hvernig tíminn líður alltaf hraðar og hraðar, nauðsynlegt að gera eitthvað í þessu! Við höfðum það nú alveg ágætt yfir hátíðarnar að öllu jöfnu en veikindi settu samt strik í reikninginn. Við veiktumst öll viku fyrir jól, fengum ælupest ojbara. Svenni byrjaði nóttina áður en ég átti að mæta í próf, ég fór í prófið daginn eftir ákveðinn í að smitast amk ekki fyrr en eftir að því væri lokið. Það var eins og við manninn mælt um leið og ég kom út úr prófinu kl. fjögur, fór mér að líða einkennilega og svo um kvöldmatarleytið var ég orðin veik. Freyr ældi svo daginn eftir og fékk hita í kjölfarið. Þeir feðgar jöfnuðu sig ekkert almennilega eftir þetta, þót ekki með ælupest sem betur fer. Svenni var tussulegur alla hátíðina og Freyr var með hósta og hor en þó hress. Þeir eru fyrst að losna við þetta núna á nýju ári.
Harpa, Gunnar, Birkir og Kári komu fyrir jól og fóru fyrir áramót. Það var ofsalega gaman að fá þau, ég vildi ekki án þeirra vera um jólin. Freyr varð strax stórhrifin af frændum sínum, skreið til þeirra og dundaði sér við hliðiná þeim, fylgdist með þeim og lék sér við þá. Við vissum bara ekki af drengnum þegar þeir voru saman, en annars er hann ekkert of duglegur að dunda sér svona þegar hann er bara með okkur.
Við vorum dugleg að skjóta upp um áramótin, keyptum dýrar og flottar bombur, þar sem Svenni fékk þær á helmingsafslætti. Freyr var ekki vitund hræddur, kom með okkur á brennu en sofnaði svo þegar við komum heim. Hann rumskaði ekkert í látunum á miðnætti.
Næsta önn á eftir að vera strembin og mikið púsluspil að láta þetta ganga upp. Freyr verður áfram hjá Guðlaugu dagmömmu til kl 14 á daginn en hún er ekki lengur. Ég Hrönn verð í 12 einingum í háskólanum ásamt 100% vinnu og Svenni verður í 100% vinnu, svo er bara að láta þetta ganga upp!!! Skipulag hlýtur að vera lykilorð í þessu tilfelli. Ætli ég verði ekki að skorast undan því að þjálfa blak eins og ég gerði fyrir áramót, læt nægja að æfa sjálf og vera í Fræðsluráði.
Nú styttist óðum í 1 árs afmæli Freys. Það verður forvitnilegt að vita hvort hann verði farinn að ganga. Hann hefur fínt jafnvægi enda búinn að ganga með lengi. Hann er aðeins að æfa sig að sleppa sér og standa sjálfur og svo hefur hann tekið tvö skref. Hann er hins vegar frekar hræddur við þetta og lippast oftast niður ef hann skynjar að við ætlum að sleppa takinu. Annars er allt gott að frétta af stráknum. Hann er farinn að skilja ýmislegt, miklu meira en við höldum.Flest tjáskiptin hans fara þó fram í orðinu ,,dudda". Hann þekki orðin þegar við segjum þau, hugsar sig vel um og endurtekur svo ,,dudda". Ég held að hann heyri þetta orð öðruvísi en við og haldi að hann sé að segja þetta bara alveg rétt.
En jæja ég ætla að láta þetta duga í bili og jú við hljótum að hafa það af að setja inn myndir bráðlega.
bestu kveðjur

8-9 mánaða vídeó

Myndir úr 8-9 mánaða albúminu

Haustlitamyndband

Farinn að standa upp og komin tönn

Um helgina lærði Freyr að standa upp og nú hífir hann sig á fætur og gengur meðfram eins og herforingi. Í dag gægðist svo fyrsta tönnin upp úr gómnum.
Í síðustu viku fór Freyr í fyrsta skipti á snjóþotu, enda fór allt á "kaf" í snjó hérna eitt kvöldið, honum þótti það ekki leiðinlegt - takk fyrir lánið á þotunni Auður.

Framkvæmdir í húsinu hafa nú rumskað af dvalanum, búið er að klára að gifsklæða þvottahúsið, sparsla og mála. Hálft gólfið hefur verið flísalagt og þegar búið verður að fúga verður innréttingin sett upp. Við eigum svo von á því að restin af handriðinu á stigann komi í mánuðinum.

Við erum að fara suður núna á miðvikudaginn, námslota hjá Hrönn. Við feðgar hyggjumst eyða okkar tíma í borginni í Europris - ég reikna þó ekki með að móðirin samþykki það.

Nýjar myndir koma fljótlega.

Forbrydelsen og skrið

Jæja ég er í vinnunni og ætla að stelast til að blogga svolítið, auðvitað nóg að gera en ég nenni því bara ekki. Horfði á fyrsta þáttinn af Forbrydelsen í gær sem Jóhanna hefur talað svolítið um. Eftir þáttinn velti ég því svolítið fyrir mér hvað það er sem gerir það að dönsku þættirnir eru svona miklu betri en þeir amerísku og jafnvel bresku. Niðurstaðan eftir þennan þátt var að hann er í fyrsta lagi miklu betur leikinn, persónurnar eru eðlilegar og manneskjulegar. Fókusinn á fórnarlömbinn er meiri þannig að maður fær strax samúð með þeim sem mér finnst nauðsynlegt til að geta lifað mig inní þætti. Söguþráðurinn er hins vegar ekkert endilega frábrugðinn en hann er bara alls ekkert aðalatriðið. Ég legg til að Danir taki Kanana í smá kennslustund.
Freyr er skyndilega kominn á fullt. Jæja ég segi ekki að hann sé hraðskreiður en jú það kemur fyrir að hann er skyndilega horfinn fyrir horn. Hingað til hefur hann farið fetið á rassinum og ekki farið af stað nema að takmarkið sé í mesta lagi í metersfjarlægð. Núna er hann hins vegar orðinn stórhuga og leggur af stað í langferðir frá stofunni og inn í eldhús og rannsakar allt á leiðinni. Það heyrðust því hamarshögg hjá okkur í gærkvöldi, Svenni festi geisladiskahilluna við vegginn ásamt því að binda rammann stóra við vegginn. Hlutir sem okkur þykir vænt um og eru brothættir eru komnir ofarlega en í staðinn höfum við raðað litlu dóti í gluggakistuna. það er sem sagt hafinn nýr kafli í okkar lífi ;-)
Ennþá bólar ekkert á tönnum en gómurinn er allur hrufóttur og hvítur.

Best að fara að vinna
Kveðja Hrönn

Hvatvísi

Ég (Hrönn) fór á ráðstefnu/námskeið um ADHD (athyglisbrest með ofvirkni) á fimmtudag og föstudag. Það var mjög skemmtilegt og gagnlegt fannst mér. Ofsalega liggur rígurinn milli Fjarðabyggðar/Neskaupstaðar og Egilsstaðar djúpt í okkur. Einhver konuálka fór skyndilega að tala um hvað það væri nú lítið aðhald og að börnin valsa bara um á heimavistinni í Neskaupstað og það væri nú ekki gott fyrir blessuðu ofvirku krakkana. Ég sat nú á mér að mestu en lét hana bara að vita að það væri nú umsjónarmanneskja þarna hjá okkur eins og á Egilsstöðum en gamall Norðfirðingur búsettur á Eskifirði gat ekki setið á sér og baunaði á hana á móti að ekki væri vistin á Egilsstöðum mikið öðruvísi. Stemmningin í kaffihléinu var svolítið undarleg, allir að tala um þetta og konuálkan stóð þarna rauð í framan. Mér finnst ótrúlegt hvað fullorðið fólk á erfitt með að sjá hvað er viðeigandi að tala um hvar, fleiri voru t.d. að koma með einhver persónuleg dæmi um son sinn sem fékk ekki nægilega aðstoð bla bla. Afhverju getur fólk ekki verið faglegra og talað meira almennt. Hér er ég reyndar með gagnrýni á blogginu mínu en það er í fyrsta skipti og í trausti þessi að þetta fólk sem ég tala um kíkir aldrei hér inn.
Ég er farin að hafa talsverðar áhyggjur af því að ég komist ekkert áfram í vinnunni minni, vegna lítils starfshlutfalls, námslota, starfsþjálfunar hjá Þekkingarnetinu og námskeiða. Úff er eitthvað að myndast við að kalla nýnemana til mín, en verð örugglega að því fram á vor, hef því engan tíma fyrir þá nemendur sem verulega þurfa á aðstoð að halda.
Freyr er hress að vanda, er í vagninum sínum búinn að vera í um 3 klst, hlýtur bara að fara að vakna. Við eigum í smá basli með hann á nóttunni, hann vaknar fulloft (sem getur reyndar verið einkenni ofvirkni en í trausti þess erfðaþáttur skýrir ofvirkni í 80% tilfella, leyfi ég mér að halda að þetta sé eitthvað annað) Síðustu nótt drakk hann reyndar bara einu sinni, en vaknaði oftar og við færðum hann nokkrum sinnum úr sínu herbergi og inn til okkar. Hann er farinn að verða svolítið ómögulegur að sofa hjá, er oftast kominn þverrt og farinn að sparka í andlitið á okkur.
Annars á hann til ótrúlegustu hljóð og svipbrigði, hann smellir, smjattar, fretar og skrækir. Honum finnst mjög gaman að klappa og kann að klappa þannig að það heyrist vel í. Við horfðum saman á spurningarþáttinn útsvar í gær sem Frey fannst hinn skemmtilegasti og klappaði oftar en ekki þegar við átti.

Jæja ætli ég fari ekki bara að ná í guttann.
Baráttukveðjur
Hrönn

8 mánaða skoðun

Freyr fór í skoðun í morgun, fékk sprautu og var mældur í bak og fyrir
Nú er hann 9,15kg og 71,5 cm.

Nýjar myndir

Komnar eru inn myndir á myndasíðunni hans Freys.

Hæfileikamaður

Ég skal aðeins láta heyra í mér, ég veit hvað það er leiðinlegt að fylgjast með bloggsíðum þar sem ekkert gerist langtímum saman. Jú jú við erum nokkuð upptekin þannig séð þótt að námið sé nú ekki almennilega farið að trufla mig ennþá. Vona að þessi önn verði ekkert mjög slæm, fer í starfsþjálfun í Þekkingarnetið sem er staðsett á Egilsstöðum fyrir áramót en veit ekki ennþá hvert ég fer eftir áramót. Það er ofsalega gaman að vera byrjuð að vinna og ég held að við höfum öll haft gott af því að skipta svona deginum á milli okkar. Ég er búin að sannreyna það sem ég vissi að hálf námsráðgjafastaða er bara alls ekki nóg við VA. Vona bara að ég geti sannfært Helgu um að gera hana að amk 75% stöðu. En það hefur samt sem áður verið mjög gaman í vinnunni enda er ég heppin að vera í vinnu sem mér finnst afskaplega skemmtileg takk fyrir.
Jæja nóg um mig. Áslaug vildi vita yfir hvaða hæfileikum Freyr býr yfir núorðið. Hmm látum okkur sjá. Freyr er orðinn afskaplega góður að sitja enda samþykkir hann ekki neinar aðrar stellingar nema þá helst að standa sem er náttúrulega toppurinn. Hann mjakar sér hægt áfram á rassinum nokkra sentimetra í einu og þá aðeins ef hann hefur eitthvað að sækja í seilingafjarlægð. Þetta litla mjak verður nú samt til þess að hann færir sig stundum um jafnvel tvo metra á gólfinu. Gallinn er hins vegar sá að við þurfum að elta hann með púða til að setja fyrir aftan hann því að allt í einu verður hann pirraður og ef enginn tekur hann upp strax þá bara kastar maður sér aftur á bak til að tryggja það að einhver komi, og það getur orðið ansi vont að skella á parketinu.
Freyr getur veifað, klappað og sýnt hvað hann er stór en ekkert endilega eftir pöntun. Hann lítur á ljósið ef hann er spurður hvar það er. Hann segir mamma pabba en þá helst þegar hann er að kvarta. Frey finnst skemmtilegt að gera týndur bö, rúlla bolta á milli, opna og loka örbylgjuofninum, dansa í göngugrindinni, kitla og vera kitlaður og það er ýmislega annað sem kætir hann.
Freyr er sem betur fer engin mannafæla og hefur afskaplega gaman af því þegar fólk veitir honum athygli. Við pabbi hans kíktum á einleikinn "Pabbinn" og amma Sýbillia svæfði hann og passaði á meðan og gekk það svona líka vel. Áðan færðum við rúmið hans í sér herbergi og verður spennandi að sjá hvernig það gengur. Hann vaknar nú ennþá einu sinni á nóttu og einu sinni um morgun til að drekka og stundum þarf aðeins að snudda hann þannig að vonandi höldum við út að fara í næsta herbergi til að sækja drenginn.
Það gengur vel að gefa Frey að borða enda mikill nautnaseggur á ferð. Hann borðar ýmislegt grænmeti t.d. kartöflur, sætar kartöflur, blómkál, gulrætur og jafnvel tómata, en ávextirnir eru í uppáhaldi og þá helst banani en hann lætur nú bjóða sér flestar tegundir. Kjöt hefur ekki mikið farið inn fyrir hans varir enda ekkert spenntur fyrir því. Ennþá fær hann brjóstið nokkrum sinnum á dag og er það alltaf jafn gott.
Nú fer að styttast í að mamma gamla verði þrítug, að hugsa sér! Ætlum við að skreppa norður í sumarbústað um næstu helgi af því tímabili og hitta þar, Auði, Daða og fjölsk, Jónu, Sigga og fjölsk, Hörpu, Gunnar og fjölsk og kannski fleiri, ég hlakka mikið til.
Jæja þessi færsla bætur vonandi að einhverju leyti fyrir langa pásu, spurning hvort við komum myndum bara inn í kvöld.
kær kveðja
Hrönn

Reykjavíkurferð

Síðustu viku vorum við fjölskyldan í Reykjavík, Hrönn var í staðbundinni námslotu og karlpeningurinn fylgdi með. Við keyrðum suður i einum áfanga og gekk það ótrúlega vel, sem og heimferðin sem einnig var farin í einum áfanga. Freyr virtist bara sætta sig nokkuð vel við þessa meðferð en var samt ósköp feginn að koma heim aftur. Meira síðar (kannski).

Myndir

Inn eru komnar nýjar myndir. Nú er Verslunarmannahlegin runnin upp og allt fullt af vinum og ættingjum í bænum, alveg geggjað. Held ég bloggi bara síðar.

6 mánaða mæling

Freyr var mældur í morgun, 8,3kg og 69,5cm

Hann fylgir víst sinni "kúrvu" staðfastlega.

Stutt ferðasaga

Við fjölskyldan erum komin heim frá 12 daga ferðalagi í Danmörku. Við stoppuðum í viku í Kaupmannahöfn þar sem Svenni hafði fengið íbúð í gegnum BHM. Eygló var með okkur allan tímann í Köben en Óli kærastinn hennar stoppaði í tvo daga og Steina amma stoppaði í nokkra daga. Kaupmannahöfn er alltaf ótrúlega skemmtileg. Freyr var reyndar ekki alltaf sammála því, hann gerðist hin mesta frekja í þessari ferð enda orðinn hundleiður á að hanga í vagninum eftir nokkra daga. Hann átti einnig ansi erfitt með að sofa innan um allt þetta fólk og fór það oft í skapið á honum. En þetta slapp allt saman og varð hin fínasta borgarferð. Við röltum um borgina, kíktum á það helsta eins og Den lille havfrue, Bakken, Nyhavn, Zoo, Strikið, Fields og så videre. Eftir Kaupmannahöfn skrapp Eygló í heimsókn til Óla í Århus en litla fjölskyldan tók bíl á leigu og brunaði til Slagelse þar sem móðurbróðir Hrannar og fjölskyldan hans býr. Þar stoppuðum við í hádegis og kvöldmat og röltum um bæinn. Freyr var guðslifandi feginn að komast loks ud på landet (einungis um 40 þús búa þarna) og steinsvaf í vagninum sínum. Við hittum nánast alla fjölskylduna hans Jensa móðurbróður sem var mjög skemmtilegt. Áfram var haldið til Odense þar sem við sóttum Jóhönnu, Valdimar og Helga Gnýr heim. Þar var tekið á móti okkur með gjöfum handa Frey. Við höfðum það ótrúlega gott í Odense enda þau fjölskyldan höfðingjar heim að sækja. Skruppum í Legoland og Kerteminde ásamt því að rölta um Odense. Jóhanna og Valdimar sáu afskaplega vel um okkur, útbjuggu madpakke fyrir ferðalög og elduðu dýrindismáltíðir. Umhverfið í kringum þau er æðislegt þótt að þau séu óheppin með drykkjunágranna og þjófa...
Það var nú ósköp gott að koma heim. Freyr er aftur orðinn rólegri og hægt er að leggja hann frá sér á ný án þess að hann fari að vola. Hann fékk graut um leið og heim var komið enda meira en tilbúinn. Freyr lærði einnig nánast að sitja í ferðinni, situr nú eins og fínn maður með smá stuðning því að stundum kastar hann sér aftur á bak eða til hliðanna ef því er að skipta.
Þá er bara að njóta það sem eftir er sumars og vonast eftir að góða veðrið heimsæki okkur aftur.

Myndir úr Danmerkurferð

Ferðasagan kemur síðar

Nýtt albúm

Ökufært í bílskúrinn, Akureyrarferð, Danmerkurferð og fleira

Nú í dag varð loks ökufært að bílskúrnum, ekki er reyndar ennþá fært inn í hann út af drasli en nú er ekki lengur stór hola framan við dyrnar. Í vor var steyptur stoðveggur við hornið á húsinu og nú var verið að fylla að honum og jafna bílastæðið út. Þetta verður hinn mesti munur, a.m.k. er gott að fá meira pláss á bílastæðinu.

Á sunnudaginn fórum við fjölskyldan ásamt Grími og Sýbillu norður á Akureyri í útilegu, komum aftur á mánudagskvöld. Þetta var fyrsta útilegan hans Freys og stóð hann sig bara vel enda var veðrið með endæmum gott og viðlegubúnaðurinn ekki af verri endanum. Opinber ástæða ferðarinnar var að sækja Birki og Kára voru að koma í heimsókn hjá afa sínum og ömmu. Húsið hjá þeim (afanum og ömmunni) er reyndar ekki mjög gestvænt sem stendur þar sem verið er að skipta um eldhúsinnréttingu, baðinnréttingu, baðkar, neysluvatnslagnir og ábyggilega eitthvað fleira. Strákarnir ásamt ömmunni búa því hjá okkur núna en afinn fær að dúsa á byggingarsvæðinu þangað til hann verður búinn að klára þetta ;-)

Á föstudaginn leggjum við svo haf undir væng og bregðum okkur til Danmerkur í fjölskylduferð. Fyrir fjölskyldu sem býr dreifð um landið er hentugast að hittast í Kaupmannahöfn. Eygló kemur frá Reykjavík og Steina kemur frá Vopnafirði - fljúgandi frá Akureyri. Við fljúgum út frá Egilsstöðum.
Við verðum í viku í Kaupmannahöfn en förum svo og heimsækjum frú Jóhönnu og fjölsk. í Odense. Það verður áhugavert að sjá hvernig Freyr tekur tímamismuninum því að hann virðist hafa mjög gangvissa líkamsklukku og sofnar alltaf klukkan 9 á kvöldin. Það er verðugt rannsóknarefni hvort hægt er að stilla þessa klukku á annað tímabelti, en það munar nú ekki nema 2 tímum en það er nú full snemmt að fara í háttinn klukkan 7 og vakna klukkan 6 á morgnana - okkur þætti það ekkert verra þó mismunurinn væri á hinn veginn en þetta kemur allt í ljós - Freyr væri vís til að koma okkur enn og aftur á óvart og aðlaga sig fljótt að nýjum aðstæðum.
- Uppfærsla: þetta virðist hafa snúist í hausnum á mér, klukkan er víst á undan í Danmörku þannig að ef Freyr heldur áfram að sofna kl 21 að íslenskum tíma og vakna kl 8 þá er það víst kl 23 og 10 í Danaveldi - sem er nú bara mjög þægilegur tími þegar maður er í fríi, en það verður samt spennandi að fylgjast með því hvort líkamsklukka Freys aðlagar sig að öðru tímabelti.

Í síðustu viku sáðum við grasfræi í garðinn okkar og bíðum við nú spennt eftir því að eitthvað fari að spretta upp af þeim, það er nú lítið farið að gerast ennþá en það ætti nú eitthvað að vera farið að gerast þegar við komum aftur að utan. Dúfurnar hafa ekki ennþá uppgötvað þetta hnossgæti sem við berum á borð fyrir þær og vonum við að þær missi alveg af þessu, það er víst eitt af helstu vandamálunum við sáningu að halda fuglunum í burtu.


Eitthvað af myndum ætti að koma inn á næstu dögum - a.m.k áður en við förum út, það er víst best að tæma myndavélina áður. En þangað til - veriði sæl.

Næsta þroskastig

Fannst mikilvægt að láta ykkur vita að nú kann Freyr að velta sér frá bakinu yfir á magann. Þetta gerir hann orðið bara oft til þess að sækja sér dót sem er fyrir ofann hann. Hann velti sér fyrst óvart frá maganum yfir á bakið þann 1. maí og rúllaði nokkrum sinnum yfir næstu daga, síðan þá hefur hann ekki gert það hins vegar og kenni ég um betra jafnvægi. Markmiðinu er sem sagt náð að hann kunni að velta sér fyrir 5 mánaðaaldurinn ;-)

Vöðlavíkurferð og fleira

Jæja, það er best að standa við stóru orð Hrannar um að ég bloggi bráðlega.

Ýmislegt hefur drifið á daga okkar undanfarið, við höfum verið að slétta og grjóthreinsa garðinn og stefnum við að því að sá í flötina á næstu dögum. Veðrið hefur leikið við okkur og hvern sinn fingur undanfarið og hefur ástandið jafnvel orðið þannig að of heitt hefur verið til að vinna í garðinum - þá er nú gott að svalirnar eru komnar upp því þar er gott að sleikja sólina - og ís ;-)

Í gær var svo haldið upp á fjölskyldudag Gerpis um allt land - við fórum í Vöðlavík/Vaðlavík og grilluðum á Ímastöðum. Freyr prófaði fína bakpokann sinn og var bara nokkuð rogginn þar - þrátt fyrir að vera ekki farinn að sitja sjálfur eins og gerð er krafa um í leiðbeiningunum.

Þrátt fyrir stór orð þá held ég að ég hafi þetta ekkert lengra í bili, en eitthvað af nýjum myndum eru komnar í 4-5 mánaða albúmið.

Enn nýjar myndir

Svenni bloggar bráðum... vonandi

Nýjar myndir

eru komnar í 4-5 mánaða albúmið, njótið.

Nýjar tölur

Freyr var mældur í bak og fyrir í morgun, 7,3 kg, 65,5 cm langur og höfuðmál 44 cm. Já það teygist á honum í allar áttir.

Nýjar myndir

Komnar eru nýjar myndir

3ja - 4ja mánaða

Tvö ein í kotinu

Svenni var að fara suður á landsþing björgunarsveitanna í morgun. Við Freyr erum því tvö ein en komum nú til með að plumma okkur þótt að við söknum hans. Strákurinn okkar breytist þroskast mjög hratt núna, það er allt að gerast bara enda verður hann fjögurra mánaða á þriðjudaginn. Hann er farinn að grípa í alla hluti og stinga upp í sig, þannig að allt í einu þarf maður að passa sig á honum þegar hann situr í fanginu á manni við borðið. Freyr er ekki bara líkur pabba sínum í útliti heldur sýnist mér stefna í að hann verði algjörlega takkaóður eins og Svenni. Hann á dót með dýratökkum sem heyrast dýrahljóð í þegar hann ýtir á þá og var ekki lengi að átta sig á þessu. Hann ýtir og ýtir eins og óður maður. Eins er hann farinn að ráðast á tölvuna þegar hann sér hana og teigir sig fram til að ýta á takkana af mikill áfergju. Freyr dafnar líka mjög vel, hann er orðinn stór og þungur og farinn að síga vel í svo að mamman reynir að komast í sund amk þrisvar í viku til að styrkja bakið. Hann er líka ofsalega glaður og líflegur og bara alveg frábær ;-) já já meiri að segja ég er orðin pínu væmin ég viðurkenni það.
Núna liggur Freyr útí vagni í veðri sem ég voga mér ekki útí sjálf, algjöru vetrarveðri rok og slydda. Honum líður hins vegar mjög vel þarna úti, vona ég. Að vísu var ekki hægt að hafa hlustunartækið úti því það fór stöðugt í gang vegna látanna í veðrinu.
Við Daði erum að fara í útskrift VA á morgun. Okkur var boðið ásamt þeim sem útskrifuðust um leið (þ.á.m. Svenni og Bryndís), af því tilefni að við tilheyrum fyrsta hópnum sem var alfarið útskrifaður frá VA án aðstoðar frá ME. Það eru 10 ár síðan, það er nú ekkert svo mikið er það? Daði ætlar að halda ræðu eins og hann gerði fyrir 10 árum en ekki sömu ræðuna þó. Við reyndum að setja saman einhverja punkta um daginn en mundum reyndar ekkert mjög mikið en vorum sammála um að það hafi bara verið rosalega gaman á þessum árum. Mér fannst skólinn meiri að segja svo fínn að ég ákvað að fara að vinna þar sjálf og líkar það rosalega vel. Hlakka bara til að fara að vinna hálfan daginn í haust.
Jæja elskurnar læt þetta duga, bráðlega koma inn myndir sem eru m.a. teknar á nýju starfrænu EOS 400 myndavélina hans pabba, svaka græja.

Horfið er nú sumarið og sólin

Já það hefur verið einmuna veðurblíða eins og sést á þeim myndum sem Svenni setti inn. Ég á nú kannski eftir að bæta fleirum inn, mér finnst hann alltaf svolítið spar á myndirnar ;-) En eins og sumir austfirðingar vita (ekki Esk- og Reyðfirðingar þó) var heil vika þar sem hitastigið fór ekki niður fyrir 16 gráður. Freyr var svolitla stund að átta sig á þessu en síðustu dagana var hann farinn að geta sofið á samfellunni í vagninum sínum og haft opin augun úti en þó aðeins ef hann var í skugga. Ég (Hrönn) sem átti að vera læra gat auðvitað ekki hugsað mér það og var svona í laumi að vonast til þess að veðrið versnaði því að lokaskil á heimaprófi nálguðust óðum. Það kom líka að því að það snarkólnaði og núna erum við farin að klæða strákinn upp í flísgallann sinn og allt er orðið eins og hann hefur átt að venjast meiri hluta ævi sinnar.

Freyr breytist mjög hratt þessa dagana. Hann er orðinn flinkur að liggja á maganum og velti sér um daginn yfir á bakið alveg óvart þó. Hann tók svakalegan vaxtarkipp stuttu eftir að hann var mældur og hefur nú lengst um marga cm á örfáum dögum. Hann er alltaf mjög ræðinn. Æfir ýmis hljóð og dundar sér heillengi við að æfa kvarthljóðin vel áður en hann velur besta kvartið til að nota í það og það skiptið. En ósköp er hann nú þægilegur drengurinn, kvartar bara ef hann vill félagsskap og er svangur. Hann sofnaði í heila viku kl. fimm mín í níu en er nú orðinn viltur og á það til að sofna bæði 20 mín í og yfir níu. Fyrsti lúrinn er oftast 6-9 tímar sem er bara lúxus. Eina vandamálið er því að það er bara mamma sem má svæfa hann. Pabbinn er skemmtilegur mest allan daginn, það vantar ekki en eftir klukkan átta á kvöldin verður hann alveg ómögulegur og ekki að ræða það að vera hjá honum. Við reynum að taka á þessu og vonumst svo bara til að þetta vaxi sem fyrst af honum.
Eins og glöggir mynskoðendur sáu eru svalirnar að rísa hjá okkur, verst að sumarið er búið ;-) Ég hugsa að svalirnar verði bara orðnar nothæfar á þriðjudag, en Svenni ætlar að leggja ,,gólfið" í þær um helgina. Eins er verið að steypa veggi til að halda uppi jarðveginum þannig að það er að lifna yfir framkvæmdunum á nýjan leik.
Segi þetta gott af lífinu á Þiljuvöllum 9 en gaman væri að þið sem lesið en hafið aldrei skrifað comment kvittið, ekki vera feimnar elskurnar.

Nýjustu tölur úr Norðausturkjördæmi

.... eru kannski ekki svo nýjar, síðan á föstudaginn. Freyr mældist í þriggja mánaða skoðun 6,45 kg og 62 cm - hann hefur því aðallega stækkað á þverveginn síðan síðasta mæling fór fram.

Annars er bara allt gott að frétta, móðirin hefur verið upptekin við lærdóminn síðustu vikur, kláraði ritgerð á föstudaginn og tók til að "heimapróf" á um helgina. Faðirinn dundar við "home improvement" þegar drengurinn sefur, gólflistar og gluggatjöld voru helstu verkefni helgarinnar. Svo er alltaf verið að hugsa um garðinn. Grjóthreinsun gengur hægt og örugglega (verður lokið síðla sumars 2015 með sama áframhaldi) en í gærkvöldi mætti Daði grár fyrir járnum með keðjusög og saxaði niður gömul tré sem voru neðan við lóðina, þau þóttu of gömul og lúin til að halda upp á þau lengur. Nú er sennilega eins gott að fara að koma niður nýjum trjám til að þetta verði ekki eins eyðilegt allt saman.

Við erum búin að panta okkur flugferð til Danmerkur í lok júní, nýtum okkur flug Iceland Express frá Egilsstöðum, það munar talsverðu að þurfa ekki að þvælast suður til þess eins að skreppa til Köben. Við verðum tæpan hálfan mánuð og stefnum auðvitað að því að heimsækja Jóhönnu og fjölsk.

Nýjar myndir

Það eru komnar nýjar myndir m.a frá Ísafirði. Ath að við bættum einnig myndum inná milli í 2-3 mánaða albúmið.
Á morgun fer Freyr svo í þriggja mánaða skoðun.

Ísafjarðarferð

Um páskana fór Freyr í útskriftarferð sína úr 1.bekk ferðalagaskólans. Við fjölskyldan lögð land undir fót og fórum til Ísafjarðar. Við nenntum ekki að keyra þetta en flugum í staðinn, með millilendingu í Reykjavík enda ekki annað í boði. Freyr tók þessu vafstri með jafnaðargeði og lét sér þetta vel líka. Við vorum svo í góðu yfirlæti yfir páskana og rúmlega það hjá Hörpu og Gunnari og var Kári sérstaklega ánægður með að fá "litla Frey" í heimsókn, hann var líka duglegur að fá Hrönn til að leika við sig. Við fórum svo aðeins á skíði og talsvert í göngutúra um Ísafjarðarbæ. Þátttaka okkar í "Rokkhátíð alþýðunnar" var frekar lítil, náðum víst lágpunktinum á henni, Mínus (sem voru full háværir og þungt rokkaðir fyrir okkar smekk) og biðinni eftir Blonde Redhead sem voru svo víst ekkert í sérlega góðum gír (við gáfumst reyndar upp á biðinni áður en við gátum upplifað það).

Freyr náði sér í sitt fyrsta kvef fyrir vestan og kræktu báðir foreldrar hans sér í það líka. Þeir kvörtuðu þó meira en sá stutti þó svo að það geti verið erfitt að sjúga þegar nefið er hálfstíflað. Foreldrarnir eru enn að ræskja sig og sjúga upp í nefið en Freyr virðist vera búinn að hrista þetta af sér.

Það var vægast sagt misviðrasamt á Ísafirði, eða réttara væri kannski að segja skjótviðrasamt því að það var ekki hægt að draga neina ályktun af því hvernig veðrið yrði næstu tímana af því að líta til veðurs. Síðasta daginn löbbuðum við t.d út á Eyri í smá rigningu en ekki miklum vindi, fórum svo á búðarölt og bakarísheimsóknir í sól og smá vindi, hugðumst labba heim seinnipartinn á móti vindinum sem hafði aukist en þar sem var þurrt töldum við það ekki koma að sök en við vorum ekki komin langt þegar fór að mígrigna með rokinu. Þá fundum við strætóstoppistöð og biðum þar í ca 20 mínútur og á þeim tíma hafði stytt upp, farið að snjóa, lægt, hvesst, birt til, dimmt yfir og sjálfsagt eitthvað fleira - en heim, inn í Fjörð, komumst við að lokum í grænum strætisvagni.

Hrönn er vís til með að skrifa eitthvað meira um þessa ferð - en ég lofa engu.

Nýjustu tölur

Nei ég er ekki með nýjustu tölur úr Hafnarfirðinum ef þið hélduð það. Ég ætla bara rétt aðeins að láta ykkur vita hvað strákurinn hefur stækkað. Hann fór í 9 vikna skoðun á föstudag og mældist þá 5,9 kíló og 61 cm, höfuðmálið var 42 cm. Hann er nokkuð vel yfir meðaltalinu en samsvarar sér bara vel pilturinn. Ég hallast reyndar að því að þetta meðaltal eigi ekki við nútíma íslensk börn sem eru að jafnaði vel haldin.
Svo vil ég nú bara biðja hana Eygló mágkonu mína afsökunar, uss auðvitað hitti ég hana og hún færði Frey meiri að segja forláta athyglisjúkt epli og dýrabók. Eygló myndi sko ekki láta sig vanta þar sem Freyr er annarsvegar. Svo hittum við líka Óla og það þrátt fyrir að Gettu betur væri í sjónvarpinu.
Kveð að sinni

Komin heim

Þá er fjölskyldan reynslunni ríkari, búin að skreppa til Reykjavíkur og til baka aftur, ekkert mál. Ég fór til að sinna náms- og starfsráðgjafanáminum mínu sem ég stunda í fjarnámi. Laugardagurinn fór allur í þetta frá 8 til 16. Ég kveið þessu talsvert, hef auðvitað aldrei þurft að vera svona lengi í burtu frá Frey. Ég undirbjó þetta talsvert, mjólkaði mig um nóttina og ræddi málin við kennarann minn. Varaði hana við því að ég gæti þurft að skreppa heim án fyrirvara og kannski oft yfir daginn. Þegar skipt var í hópa (sem er oft gert í slíku námi) passaði ég mig á því að ég væri ekki valin í tveggja manna hóp (já tveir er hópur og líka fjölskylda ef því er að skipta). Sem sagt gerði svona smá vesen. Nei nei þá voru feðgarnir bara óþolandi sjálfstæðir, ég skrapp bara snemma í mat og gaf honum einu sinni og bara úr örðu brjóstinu, meira þurftu þeir ekki á mér að halda. Svo heldur maður að maður sé ómissandi.

Ath nýjar myndir í 1-2 og 2-3 mánaða möppunum. Sé að Svenni hefur sett nektarmynd af mér inn, þið farið bara hratt yfir hana.

En þetta gekk sem sagt mjög vel og lofar því ferðin vestur til Ísafjarðar eftir viku bara góðu. Við hittum ótrúlega marga miðað við hvað tíminn var naumur, Kristínu og börn /systkini Svenna og færðu þau honum Frey hátæknidót voða fínt, Ásturnar tvær, Steinunni, Stefán og Ólínu, Bryndísi og Jóa og síðast en ekki síst Steinunni, Stefán og Ólínu en því miður mistókst að hitta Guðrúnu, Friðbjörn og Odd Inga þar sem fjölskyldan var meira og minna öll lasin. Hittum þau vonandi næst.
Freyr stækkar hratt, hann fer í viktun og mælingu á morgun og kemur þá í ljós hversu vel hann dafnar. Hann er farin að stjórna höndunum meira, vandar sig við að snerta dótið sem hangir fyrir ofan hann á teppinu, hann er líka óskaplega duglegur að spjalla, kanna að segja nei, og aaaa.
En nú er hann farinn að góla.

8 vikna

Jæja, nú er kappinn bara að verða 8 vikna, það er aldeilis hvað tíminn líður. Ég er farinn að mæta aftur á vinnustaðinn og reyni að hanga þar mestallan daginn, en á meðan er heilmikil dagskrá hjá þeim mæðginum heimavið. Veðrið hefur verið gott (þangað til núna um helgina) og fara þau talsvert í gönguferðir og sá stutti sefur úti við á sérsmíðaða pallinum sem ég hróflaði upp um daginn af minni alkunnu snilld úr IKEA vörubretti og spýtnabraki sem til var í kringum húsið.

Föðuramman er búin að vera í heimsókn síðustu daga og er nú að bíða vorsins með að halda heim aftur. Hún kemur reglulega og fylgist með að drengurinn dafni vel - vill reyndar fara að troða í hann graut, en það tíðkast víst ekki með eins ung börn og þegar ég var á aldri Freys.

Við erum smám saman að venja Frey við ferðalög - fyrst fór hann með okkur á rúntinn inn í sveit, nokkrum dögum síðar upp á Skarð og því næst til Reyðarfjarðar (-langafi hans rifjaði það upp við það tækifæri að hann hefði verið orðinn 13 ára þegar hann kom fyrst til Reyðarfjarðar og skildi ekkert þetta flandur á okkur með barnið). Á föstudaginn fórum við svo upp á Hérað til að venja hann enn betur við. Allar þessar ferðir hafa gengið vel og er Freyr bara mjög sáttur við að rúnta um í bíl, hann á líka svo fínan spegil sem hann sér út um allt í. Á fimmtudaginn er svo stefnan tekin á að fara með Frey í fyrsta skipti Suður í Sollinn, Hrönn er að fara í "námslotu" og er hlutverk föðurins að mæla göturnar í Vesturbænum á milli gjafa. Þá fær stráksi að fara í flugvél í fyrsta skipti og vonum við að það gangi eins vel og bílferðirnar. Um páskana fær svo aldeilis að kenna á því á ferðamennskusviðinu því að þá verður reynt að fara með hann til Ísafjarðar, leitun er að eins afskekktum og erfiðum stað til að ferðast á ;-) þannig að ef það gengur vel útskrifast Freyr úr ferðamennskuskólanum.

Annars erum við á því að Flugfélagi Íslands sé illa við barnafólk. Ef maður bókar barn með sér í flug (meira að segja ungabarn sem fær ekki einu sinni sæti eða farangursheimild) þá neitar bókunarvélin manni oftast um ódýrustu sætin sem eru í boði ef maður prófar að bóka sig sem barnlausan einstakling. Ég er með það í undirbúningi að fá þetta rökstutt frá Flugfélaginu með hótun um fjölmiðlafár.

Af húsbyggingu er nú ekki margt að frétta nema kannski ofangreind pallasmíði. Ég afrekaði það þó um síðustu helgi að koma parketi á stigapallinn, það er mikil framför og var talsvert verk - tók a.m.k. jafn langan tíma ef ekki lengri en að parketleggja stofuna á sínum tíma. Nokkrar vikur eru svo síðan að í stigaganginum/andyrinu var komið upp forláta strimlagluggatjöldum (þannig að við búum ekki lengur út á götu) og ljósum í stað geisifagurrar lýsingarlausnar sem ættir sínar á að rekja til Rússaveldis, og gengt hefur þessu hlutverki með prýði hingað til. Eins höfum við verð að hugsa heilmikið um garðinn og er grjóthreinsun meira að segja hafin á þeim vígvellinum. Nú er garðurinn aftur á móti aftur kominn á kaf í snjó og verður víst lítið um stórsigra þar fyrr en aftur fer að vora.

Ég vil svo benda fólki á myndasíðu sem hlekkjað er á hér vinstra megin, þar detta af og til inn nýjar myndir af Frey án þess að það sé endilega tíundað hér. Nú verður albúmunum skipt niður eftir mánuðum og reynt að setja inn í jafnt og þétt.

En þá held ég að þetta sé að verða ágætt í bili. Kærar kveðjur af Þiljuvöllum 9.

6 vikna

Jæja það virkaði sem sagt. Núna er Freyr orðinn 6 vikna. Það er voða gaman að fylgjast með honum stækka og sjá breytingarnar á honum dag frá degi. Hann er farinn að vaxa upp úr minnstu fötunum sínum og passar í sumt sem stendur 3-6 mánaða á. Það er svo gaman að geta klætt hann í nýju fötin sín, hann á svo mikið af flöttum fötum kallinn.
Vinurinn brosti loksins til okkar þann 27. feb. Honum fannst hins vegar engin sérstök ástæða til að brosa næstu daga. Hann brosti hins vegar til ömmu sinnar þegar hún var að passa hann enda var hún búin að panta bros. Núna er hann hins vegar að finna húmorinn sinn og hefur brosað stóru brosi til mín síðustu tvo morgna, hann hlær nú nánast, enda er ég stórsniðug sérstaklega á þessum tíma dags. Hugsa að hann sé að hlæja að útganginum á mér, þar sem Svenni er farinn að vinna utan heimilisins og ég hef ekki alltaf tök á að ná hárinu niður og annað slíkt fyrr en Freyr leyfir mér það. Annars slæstum við í svaka fínan magapoka handa honum þannig að öll helstu verk eru unnin með hann á maganum, þar sofnar hann svo gjarnan. Hann er hins vegar þannig núna á daginn að hann vill bara sofa í fanginu á manni. Þar steinsofnar hann en vaknar um leið og reynt er að leggja hann frá sér. Hins vegar getur hann sofið í vagninum sínum en til þess að það gerist þarf líka að fara út að ganga, það þýðir ekkert að blekkja hann. Hins vegar er veðrið oft svo vont að maður kemst bara ekkert út.
Nýttum hins vegar góða veðrið sunnudaginn vel og fórum á skíði, Freyr kom með og svaf vært í vagninum í marga tíma.
Jæja nú er grenjað og grenjað í vöggunni, 10 mín þar er alveg yfirdrifið.

Prufa

Aðeins að tékka hvort að þetta virki svona, Svenni er alltaf að gera þetta meira og meira idiot proof fyrir mig en það virkar samt ekki alltaf, hvað segir það um mig...

Eins til tveggja mánaða

1 - 2
mánaða

Mánaðar gamall

Nú er kappinn orðinn eins mánaðargamall. Ennþá er Freyr ósköp góður og rólegur, langoftast. Dagarnir eru mjög mismunandi, ef hann fær tækifæri til að fara út í vagninn sefur hann lengi á daginn og höfum við stundum vakið hann til að gefa honum að drekka. Á nóttunni er hann farinn að taka upp á að sofa í svona fjóra tíma í fyrsta lúrnum en þá er bara kúnstin að fá fyrsta lúrinn á réttum tíma svo að foreldrarnir geti sofið honum til samlætis.
Við eigum í bleiu vandamáli, sama hvað við vöndum okkur við að setja bleiuna á, typpið niður og allar kúnstir, nær kapinn að pissa framhjá, sérstaklega á nóttunni. Frekar leiðinlegt að þurfa að skipta á bleiu á nóttunni, pabbinn er alltaf sendur í það. Góð ráð frá strákaforeldrum væru vel þegin.
Freyr er mjög upptekin við horfa framaní okkur og nú vantar okkur bara brosið. Hann brosir sæll og ánægður með lokuð augun eftir að hafa drukkið en ekkert félagslegt bros ennþá.
Við fáum Þórhöllu hjúkrunarfræðing í heimsókn á morgun, það verður spennandi að vita hversu þungur hann er orðinn.
Nú fer pabbinn bráðlega að stinga af í vinnu og kvíði ég því talsvert. Það er svo gott að geta sofið aðeins lengur á morgnanna og að hafa þvottakörfuna alltaf tóma ;-)

Og nokkrar myndir

Freyr

Og fleirimyndir

Freyr Sveinsson Zoëga

Og mamman lifir

Ég vildi ekki vera að flækja málin með því að blogga barnablogg inná mína síðu (eða blogga þar nokkuð yfirhöfuð) þótt að Svenni sé alltaf að reyna að fá mig til að blogga þar.
Eins og komið hefur fram þá gengur allt voða vel hjá okkur. Þessi elska gerir lítið annað en að drekka og sofa og upp á síðkastið kúka nokkrum sinnum á dag enda safnaði hann í heila viku. Við njótum því lífsins í botn, ég sef til svona 10 hálf 11 á morgnanna á meðan að Svenni vinnur hér heima til 12. Ég byrja daginn alltaf á langri og góðri sturtu og nýt þess sko í botn ef ske kynni að dag einn verði það meira mál að geta skroppið svona frá.
Freyr tekur sér oftast hátt í klukkutíma til að drekka orðið, tæmir vandlega bæði brjóstinn ef hann er í stuði og steinrotast eftir það. Við treystum því á að hann muni dafna vel og ná fljótlega fæðingarþyngd sinni þannig að hann getir farið í smá göngutúra þegar vel viðrar.
Við vorum einmitt að panta okkur bason roma vagn í gær þannig að við erum tilbúin. Pöntuðum líka dúnkerrupoka frá Reyni langafa.
Freyr er sko búinn að fá fullt af flottum gjöfum, við förum í pósthúsið á hverjum degi, ekkert smá gaman. Við viljum þakka kærlega fyrir okkur en strákurinn fer að eiga góða blöndu af fötum fyrir allt fyrsta árið sitt.
Á morgun ætlar hún Hanna Sigga að koma og vigta pjakkinn, veit svo sem ekki hvað hún gerir meira, kannski er hún til í að skúra gólfið fyrir okkur.
jæja læt þetta duga í bil. Takk fyrir alla kveðjurnar og innlitin.

Og hvað á barnið að heita ???

Eftir talsverðar bollaleggingar þá fannst okkur nafnið Freyr henta heimalingnum ágætlega. Hann mun heita fullu nafni Freyr Sveinsson Zoëga.
Nafninu tekur hann bara vel, er alveg sérlega stilltur og prúður þessa dagana, nú er hann farinn að taka hraustlega til matar síns af sérréttum "mjólkurbús mömmu" og rétt rumskar á nóttunni til að belgja sig út. Pabbinn þykir standa sig nokkuð vel í bleijuskiptum og naflahreinsunum - já og svo stendur handboltalandsliðið sig líka ágætlega í að hafa ofan fyrir foreldrunum í orlofinu.
Freyr litli var 2ja tíma gamall þegar hann horfði (reyndar sofandi) á sinn fyrsta handboltaleik (Ísland-Frakkland) og þykir ljóst að þessi nýji stuðningsmaður var það sem liðið vantaði.

Komin heim með heimalinginn.

Nenntum ekki að hanga lengur á fæðingardeildinni og komum heim í gær. Það fer auðvitað dável um okkur í fína húsinu og sýnir sonurinn öllum fínu ljósunum sérlegan áhuga (pabbanum til mikillar ánægju). Sá stutti er bara nokkuð vær og sefur mikið (síst reyndar á nóttunni).

Hér eru svo nokkrar myndir í viðbót:

Heimalingurinn #2

Heimalingurinn

Í dag fjölgaði um einn íbúa á Þiljuvöllum 9 - strákur fæddist laust fyrir klukkan 15 að staðartíma. Fæðingin gekk bara nokkuð vel miðað við fyrsta barn (segja þeir sem hafa vit á því). Stráksi mældist 3,9kg (tæpar 16 merkur) og 51cm. Móður og barni heilsast vel - föðurnum heilsast líka ágætlega, takk fyrir að spyrja ;-)

Myndir:

Heimalingurinn

Beðið eftir fjölgun

Nú erum við aðallega í því að bíða eftir nýjum íbúa með lögheimili að Þiljuvöllum 9. ETA (Estimated Time of Arrival) er 23.jan þannig að þetta ætti nú að fara að styttast. Enn hægir á húsbyggingarframkvæmdum. Hjá mér er fullmikið að gera í vinnunni - ýmislegt sem ég þyrfti helst að klára áður en ég fer í feðraorlof, en það hefur allt sinn gang.
Helstu afrek á håndværker-sviðinu síðustu daga hafa verið uppsetningar á ljósum. Hrönn hélt saumaklúbb í síðustu viku og var mér sett fyrir það verkefni að klára að koma upp ljósunum í stofunni - þessar kéllingar þurfa nú að hafa góða lýsingu til að sjá til við saumaskapinn ;-) Þetta tók mig hátt í heilan vinnudag (sem allur var unninn kvöldið fyrir klúbbherlegheitin), enda eru samtals 12 ljós í loftinu á stofunni - og enn á eftir að setja upp 7 í viðbót en það er seinni tíma vandamál. Síðustu 2 kvöld hafa svo farið í að setja upp ljós á neðri hæðinni, í barnaherberginu og hjónaherberginu.
Auður er án efa afkastamest þeirra saumaklúbbskvenna í saumum og kom færandi hendi á dögunum með heimasaumað "stuðpúðasett" í barnarúmið og himnasæng sem var sett upp í gær þannig að nú er allt að verða tilbúið fyrir heimalinginn - takk Auður.
Hrönn er komin með það skjalfest að nú sé hún orðin fullkomlega "vanfær" og skilst mér þá að ég eigi að vera sveittur við að skúra og ryksuga alla daga (sem hún virðist hafa átt að vera að gera hingað til) - verkaskiptingin á heimilinu hefur nú sem betur fer ekki verið það skýr að þetta sé alveg nýtt fyrir mér.

Gleðilegt nýtt ár.

Kæru lesendur, við óskum ykkur gleðilegs árs og þökkum fyrir liðnu árin.

Ýmislegt hefur drifið á daga okkar hjónaleysa á nýliðnu ári og þetta ár á eflaust eftir að verða enn viðburðaríkara. Húsbyggingin tók mestallan okkar tíma á árinu enda áorkaðist heilmikið á því sviðinu, hér kemur upptalning á því helsta:

• Um áramótin 2005-2006: verið að ganga frá járnabindingu og lögnum í gólfplötu efri hæðarinnar.
• 9.jan 2006: Gólfplata efri hæðar steypt.
• 16.jan 2006: Veggeiningar efri hæðar settar upp.
• 19.jan 2006: Flaggað þegar allar þaksperrur voru komnar upp, reisugilli 20.jan.
• Byrjun febrúar: Efri hæðin fullfrágengin að utan.
• Febrúar - mars: Loftið einangrað, gengið frá rakasperru og bílskúr klæddur með gifsi.
  
• Apríl: Gengið frá lektum á veggi og loft efri hæðar, rafmagnsrör og dósir á báðum hæðum.
• Fyrri hluti maí: Hitalagnir í gólf á báðum hæðum og lagt í gólfin.
• Seinni hluti maí: Innveggir klæddir með gifsi/spónaplötum, neðri hæð klædd að utan.
  
• Lok maí: Stigi á milli hæða settur upp.
• Júní: pípulagnir, klósett sett upp, loft máluð og veggir grunnaðir.
• Júlí: Veggir málaðir, sturtuklefa og baðkari komið fyrir, eldhúsinnrétting sett upp, rafmagn lagt víða, parket lagt á fyrsta herbergið
• Byrjun ágúst: Klósettkassinn á efri hæðinni flísalagður og skálinni komið fyrir -> húsið orðið íbúðarhæft. Sváfum fyrstu nóttina í nýju húsi aðfararnótt 5.ágúst. Innflutningspartý 5.ágúst (verslunarmannahelgi).
• Miður ágúst: Skruppum til Tyrklands í afslöppunarferð (kærkomin hvíld).
• Lok ágúst: Parket lagt á stofu, eldhús, annað herbergi og hol, rafmagnsvinna víða.
  
• September: Baðherbergið á neðri hæðinni tekið í notkun, garðurinn sléttaður, rafmagnsvinna.
  
• Október: Andyri flísalagt, stofuhúsgögn sett upp, rafmagnsvinna.
• Nóvember: Svefnherbergi parketlagt, nýtt hjónarúm keypt og við flytjum í hjónaherbergið, rafmagnsvinna, gólflistar og fleira.
  
• Desember: Gólflistar, gerefti á efri hæð og almennur frágangur fyrir jólin.

Ýmislegt er nú enn eftir en það klárast nú vonandi flest á þessu ári. Stærsta verkefnið er garðurinn, honum fylgir að steypa vegg til að halda bílastæðinu uppi (jarðveginum) og uppsetning svala á suðvesturhlið hússins. Innandyra er þvottahúsið aðkallandi verkefni ásamt gólflistum, gereftum, parketi á geymsluherbergið, frágangi bílskúrs og ýmsum frágangsmálum. Þetta klárast nú ábyggilega aldrei allt saman en það grynnkar nú vonandi eitthvað á þessu.
Svo skulum við nú ekki gleyma áætlaðri fæðingu barns okkar nú seinnipartinn í janúar þannig að þetta ár verður örugglega ekkert rólegra en það síðasta.

Nýárskveðja
Svenni og Hrönn

Margumbeðnar bumbumyndir

Hér má loksins sjá bumbumyndir.

Bumbumyndir

Ekki lengur í B'ham

Já ég er víst kominn heim aftur - fyrir nokkuð löngu síðan, var bara viku þar.
Ég hef auðvitað verið vinna í húsinu og hef ég náð að afkasta nokkru. Það eru t.d. komnir karmar og gereft (hvað heitir það annars á íslensku?) í kringum báðar rennihurðarnar og þeim merka áfanga var náð í gærkvöldi að hægt að kveikja og slökkva ljós að vild með rofum í öllum herbergjum (bílskúrinn undanskilinn).
Hrönn ákvað að reyna að beita einhverri skipulagstækni á mig sem hún hefur verið að læra og nú hanga verkefnalistar út um allt hús handa mér - ég fæ aldrei að slappa af.

Einhverjir hafa nú verið að biðja um myndir - en mér virðist vera algjörlega fyrirmunað að muna eftir að taka myndavélina með mér í vinnuna til að hlaða inn myndum. Ég gæti svo sem gert það heima - en þar fæ ég ekki að setjast niður nógu lengi. En þetta hlýtur að hafast fljótlega (að muna eftir að senda inn myndir).

Í B'ham

Sælt veri fólkið.
Nú er ég búinn að vera 2 daga í Birmingham á UKOUG 2006 Conference and Exhibition. Þetta er stíft prógramm, fyrirlestrar frá morgni til kvölds. Í gærkvöldi rölti ég aðeins um miðbæinn, það er búið að setja upp jólaskrautið á göngugötunum og er þetta bara að vera nokkuð jólalegt hérna verð ég að segja. Ekki er þó snjór hérna til að skapa stemminguna en mér skilst að hann vanti ekki heima á Norðfirði þessa dagana, það hefur víst verið nánast látlaus snjóbylur síðan ég fór. Það er svo sem ágætt að vera laus við það þó svo að ég hafi ekkert á móti snjó, að moka snjó finnst mér t.d. bara alveg þónokkuð skemmtilegt og gefandi starf ;-). Það er verst að vera ekki heima til að Hrönn greyið þurfi ekki að standa í því að moka bílinn inn í og út úr bílastæðinu.

Hérna koma svo nokkrar myndir teknar á símann minn hérna úti (smella á myndina til að opna albúmið).

Birmingham ferð

Á ferð og flugi

Ekki varð mikið úr því að klára rafmagnsmál um helgina - rofarnir og dimmarnir sem vantaði komu ekki í tæka tíð. Ég flýtti líka fluginu suður vegna slæms veðurútlits. Ég flaug því suður á laugardaginn og er núna á Keflavíkurflugvelli að bíða eftir fluginu til London. Það er nú hinn mesti munur að hafa þráðlausa nettengingu á flugvellinum þegar maður er einn á ferð og með fartölvuna í "vasanum".
Ég er rétt að vona að mér verði hleypt inn á ráðstefnuna því að eitthvað misskildu Bretarnir mig þegar ég var að reyna að afpanta svokallaðan "event dinner" sem ég hafði bókað með ráðstefnunni. Ég ákvað nefnilega til öryggis að kíkja á bókunina (fyrir ráðstefnuna) á netinu og þá stóð bara þar stórum stöfum CANCELLED. Ég fékk svo staðfestingu á því að "mér hefði verið aflýst" :-(
En það á að reyna að laga þetta ASAP. Ég finn mér þá bara eitthvað annað að gera í Birmingham í heila viku ef það tekst ekki.

En jæja - best að fara að skoða sig um í flugstöðinni - það er nú ekki langt síðan ég var hérna síðast (í ágúst) og þá var búið að breyta ýmsu. Nú er svo komið að maður lendir beint inn í fríhafnarbúðinni þegar maður kemur úr öryggistékkinu, og þarf ábyggilega að kaupa eitthvað þar til að komast áfram að hinum búðunum og kaffihúsunum. Og nú er sem betur fer komið aðeins meira úrval af kaffihúsum/veitingastöðum en var áður þegar okurterían réði lögum og lofum. Var einmitt að renna niður Swiss Mokka og gulrótarköku frá Kaffitári.

Fúga, rúm og hitastýring

Nú er búið að fúga forstofuna og baðherbergið uppi. Við Grímur settum svo upp dyrakarm og hurð á milli bílskúrs og íbúðar þannig að nú er hægt að loka draslið inni í bílskúrnum. Svo keyptum við okkur forláta rúm, sem hægt er að hækka og lækka til höfuðs og fóta. Nú erum við sem sagt flutt inn í hjónaherbergið, í nýja rúmið. Í gærkvöldi setti ég upp þráðlausa hitastýringu á efri hæðina, þannig að núna ætti hitinn í húsinu (þ.e. efri hæðinni til að byrja með) að verða óháðari útihitastigi og vindstyrk. Hingað til hefur vatnsrennslinu í gólfhitalögnunum verið handstýrt.
Um helgina vonast ég til þess að geta komist langt með að klára raflagnir innanhúss (ef rofarnir koma í tæka tíð að sunnan) og svo fer ég í nördaferð til Birmingham á UKOUG 2006 (United Kingdom Oracle User Group) ráðstefnu. Þar verð ég alla næstu viku.
Ég er búinn að bóka agnarsmátt herbergi á frekar sérstöku hóteli (býst ég við) það kallast nitenite og öll herbergin þar eru rétt rúmlega 6 fermetrar, gluggalaus en með loftræstingu og 40 tommu sjónvarpsskjá með "live" myndum úr myndavélum utan á hótelinu í stað glugga. Þetta er víst svona í stíl við lúxuskáetur í skemmtiferðaskipum. En þetta er á heppilegum stað og á hagstæðum prís þannig að þetta varð fyrir valinu - svo er bara spurning hvort ég verð brjálaður af plássleysi.

Parket á hjónaherbergið

Á laugardaginn fúgaði ég flísarnar á gestabaðinu, þannig að það er nánast orðið fullklárað. Á sunnudaginn réðst ég í það að parketleggja hjónaherbergið, það tók skamma stund enda er maður að verða nokkuð lunkinn við þetta þó maður segi sjálfur frá. Svo skellti ég upp rafmagnstenglum í hjónaherbergið í gærkvöldi.
Nú ætlum við að fara að panta okkur rúm í þetta fína hjónaherbergi, svona gamalmenna/sjúklingarúm sem hægt er að hækka, lækka snúa, hvolfa og ég veit ekki hvað og hvað með fjarstýringu.

meiri flísar

Það er nú farið að hægjast á framkvæmdum, samt er maður alltaf að. Nýjustu afrekin eru að tengja þvottavélina (takk fyrir allan þvottinn tengdamamma), setja handrið á stigann og byrja á flísalögn á gestabaðinu.

Í dag kom svo SFS (Sérfræðingur Frá Símanum) og tengdi ADSL-sjónvarpið. Ég er ekki alveg að skilja hvaða hag síminn sér í því að senda sérlega sérfræðinga á staðinn (notendum að kostnaðarlausu) til þess eins að setja upp ADSL-sjónvarps myndlykilinn. Ég er búinn að bíða eftir þessum manni í 4 vikur til þess eins að horfa á hann stinga myndlyklinum í samband, slá inn símanúmerið mitt og lykilorð og bíða og horfa á á meðan myndlykillinn uppfærði sig og náði sambandi við netið. Og þetta rukkar þessi sérlegi SFS símann 6000 kr. fyrir. Síminn hefði getið sparað sér þessar 6000 kr. með því einfaldlega að senda mér þessa græju fyrir mánuði síðan og leyft mér að stinga þessu sjálfur í samband. Svo hefði verið hægt að senda þennan SFS ef það hefði mistekist hjá mér. Margt er skrítið í kýrhausnum.

En jæja, best að koma sér heim að horfa á sjónvarpið.

Flísar og stofumublur

Við höfum ekki verið verkefnalaus síðustu daga frekar en endranær. Það eru komnar flísar á forstofuna (nánast alveg) og svo erum við búin að skrúfa saman hillusamstæður og skápa í stofuna. Í forstofuna er líka kominn risafataskápur með glerrennihurðum svo að smám saman fer þetta að líkjast mannabústað.
Baðherbergið niðri er líka orðið starfhæft "röryrkinn" kom og tengdi vatnið fyrir baðvaskinn svo að nú er aðallega eftir að taka til þar svo það geti talist tilbúið.

Sími

Rafvirki fjölskyldunnar mætti galvaskur í gær vopnaður CAT-5 streng og "potara". Ég aðstoðaði hann við að draga í allar síma/tölvu -lagnir. Nú er húsið því orðið síma og internetvætt.

Áhugasamir geta kynnt sér nýtt símanúmer hér (meðan þetta virkar, símaskráin á netinu er orðin svo léleg (ath: um leið og gjöld fyrir þjónustu 118 voru hækkuð) að það er ekki víst að þetta virki lengi).

Útiljósin slökkt

Ætlaði bara að taka það fram að í tilefni óvenju spennandi sjónvarpsdagskrár næstu dagana munum við hafa slökkt á útiljósunum, eins og nú er tíska. Við munum svo góna upp í loftið til þess eins að verða rennandi blaut í framan því að hér er ausandi rigning og rok.

ps. á næstu dögum ætla ég að reyna að koma mér í það að setja útiljós á húsið.

Baðherbergi

Síðustu dagar hafa farið í að standsetja baðherbergið á neðri hæðinni.
Ég er búinn að flísaleggja gólfið og klósettkassann og klósettskálin er komin á sinn stað. Í gærkvöldi byrjaði ég svo að setja upp baðinnréttinguna og er það komið vel áleiðis, neðri skáparnir komnir upp, borðplatan og vaskurinn. Nú er bara að fá píparana til að ganga frá tengingum og þá fer þetta að verða nothæft sem aðalbaðherbergi heimilisins.

Við erum komin með símastreng inn í húsið, nú þarf bara að draga í og tengja innanhúss.

Margar góðar hugmyndir hafa borist varðandi nýtingu á bakgarðinum, sundlaug, formúlubraut, blakvöllur, skíðasvæði og síðast en ekki síst að nota garðinn sem golfvöll. Ég er nú ekki viss um hvort eitthvað af þessum hugmyndum kemst í framkvæmd, en ég er þó alvarlega að spá í að fá golfvallarblöndu af grasfræi til að sá í garðinn í vor. Er mjög spenntur fyrir "green - grasi" en það krefst kannski þess að ég fái mér garðyrkjumann til að slá daglega (gæti kannski samið við nágrannann (sem slær nánast daglega) um að taka minn garð "í leiðinni" á sláttutraktornum).

Grófjöfnuð lóð

Á þriðjudaginn dúkkaði upp beltagrafa í garðinum og byrjaði að slétta úr moldarhaugunum sem voru framan við húsið, ég hef hingað til haldið því fram að þetta væru sjóflóðavarnargarðarnir mínir. Upp í fjalli er snjóflóðavarnagarður þannig að rökrétt sýndist að hafa líka sjóflóðavarnargarð. En að vel athuguðu máli þá taldi ég ekki miklar líkur á tsunami svona ofarlega í bænum.

Það er sem sagt búið að slétta úr haugunum og brjóta niður gömul tré. Lóðin stækkaði heilmikið við þetta og er ég strax farinn að kvíða slættinum. Neðan við húsið gæti ég allt eins haft alþjóðaflugvöll sýnist mér. Kannski ég hafi hafnarboltavöll, já eða völl fyrir amerískan fótbolta a.m.k. eitthvað sem skemmtilegra er að horfa á en helv#$% tuðrusparkið sem fram fer á gervigrasvellinum sem ég því miður líka útsýni yfir. Góðar hugmyndir vel þegnar í athugasemdakerfið.

Rafmagnsbilun

Á sunnudagskvöldið tókum við því rólega framanaf, vorum nýbúin að borða, skriðin upp í sófa og horfðum á sjónvarpið (það var reyndar ekki í gangi, enda ekkert loftnet eða adsl komið). Allt í einu kvikna öll ljós í stofunni, á áður óþekktu birtustigi, uppþvottavélin pípir og drepur á sér, gasskynjarinn fer að væla og ljósin í húsinu kvikna og slökkna á víxl.

- sumir hefðu kannski kallað á prest eða einhvern annan draugabana en okkur hugkvæmdist það ekki á þessari stundu -

Ég hljóp niður á neðri hæðina þar sem tók á móti mér sviðalykt mikil sem líktist óneitanlega lyktinni af soðnu slátri.

- þarna hefðu sumir sannfærst um að það að draga upp silfurkrossinn -

Fljótlega fann ég aðal upptök lyktarinnar, spennirinn fyrir fartölvuna var farinn að leka út þéttaolíu og hitna ískyggilega. Ég reif spenninn úr sambandi og henti honum út en ljósadiskóið hélt áfram. Sviðalykt var einnig af dimmerunum og nú tók ég líka eftir því að af sérsmíðaðri rússneskri ljósakrónu í einu herberginu stafaði björtu ljósi, það er nú reyndar einmitt náttúra rússneskra ljósakróna að lýsa upp en ég var nokkuð viss um að ég hafði skrúfað peruna úr þessari nógu langt til að slökkva á henni. Ég dvaldi þó ekki lengi við þær pælingar heldur fór að slá út í rafmagnstöflunni helstu stöðum í húsinu sem draugurinn virtist hafa tekið sér bólfestu í

- þessir nútímadraugar eru margir hverjir mjög rafmagnsháðir -

Þá fór nú að róast í húsinu nema að einhverjir dimmerar héldu áfram að kveikja og slökkva ljós en þó af eðlilegri styrk en áður.

Ég mældi spennuna í húsinu, hún var í hærra lagi (244v) en svo sem ekkert óskapleg. Ég ráðfærði mig við Daða nágranna, en hann hafði ekki orðið var við neitt óvenjulegt í sínu húsi en við vorum sammála um það að þetta hlyti af hafa verið ógurleg yfirspenna sem þarna var á ferð. Ég hringdi svo í Rarik til að athuga hvort þeir stæðu fyrir þessu en þeir könnuðust ekki við neitt, þeir sendu reyndar mann á staðinn til að skoða þetta en lítið kom út úr því.

Við slógum öllu út nema ísskápnum fyrir nóttina, svona svo að kofinn færi nú ekki að fuðra upp ofan af okkur. Á mánudagsmorgun fékk ég rafvirkja til að skoða þetta og eftir hádegið kom heill her af sérfræðingum frá Rarik á svæðið, þeir fundu fljótlega lausa tengingu í töflunni þar sem heimtaugin kemur inn í hana. Þessi lausa tenging virðist hafa valdið því að "núllið fór á flot" sem þýðir með öðrum orðum að í stað ca 240v spennu varð spennan í húsinu allt í einu rúmlega 400v, það er vel rúmlega það sem rafmagnstæki eiga að þola. Þetta var svo lagað og sofum við rólegri núna.

Alls brunnu yfir 6 dimmerar, 3 spennar fyrir halogenljós, vatnsdælan fyrir gólfhitakerfið, spennirinn fyrir fartölvuna og örbylgjuofninn. Við hrósum happi yfir því að ísskápurinn, uppþvottavélin, bakaraofninn og nokkrir dimmerar virðast hafa þolað þetta, en fleiri tæki og tól voru ekki tengd.

Nú erum við auðvitað búin að panta heilan gám af reykskynjurum og fá tilboð í tryggingar frá öllum tryggingafélögum, en tjónið ætti að fást bætt af tryggingu rafvirkjameistarans.
Ég er svo búinn að skipta um þá dimmera og spenna sem brunnu yfir auk þess sem pípari kom og skipti um vatnsdæluna. Við höfum það því orðið ágætt aftur í húsinu okkar.

Kv.Sv1

...og meira parket

Parketlögðum hálft herbergi (hinn helmingurinn var búinn áður) og holið niðri um helgina. Grímur mætti svo á sunnudaginn og setti upp tvenna dyrakarma og tilheyrandi hurðir. Við fórum aftur á móti í afmælisveislu á Vopnafjörð til mömmu á sunnudaginn.

Parket komið á stofuna

Um helgina lögðum við hjónaleysin parketið á stofuna, það gekk bara ágætlega - við höfðum greinilega reiknað mjög nákvæmlega út hvað við þurftum mikið því að afgangurinn var innan við hálfur planki !
Gólflistarnir koma svo vonandi í dag og ætla ég að byrja að koma þeim niður í kvöld.

Næstu skref eru svo parketlögn á neðri hæðinni, í herbergjum og holi - vonandi komumst við eitthvað áfram með það í vikunni.

Sófinn sóttur úr vetrardvölinni

Hér má sjá þegar sófinn var sóttur frá Afa fyrir innflutningsteitið.
Myndir úr teitinu má sjá myndasíðunni

Hvíld eftir innflutningspartýið

Innflutningspartýið fór vel fram, haldin var æsispennandi bjórsmökkunarkeppni þar sem miklir bjórspekingar, auk annarra sem höfðu minni trú á bjórviti sínu, leiddu sam krúsir sínar. Þetta endaði þannig að hún Auður sigraði þetta, náði 5 réttum af 15 (minnir mig).

Við hjónaleysin skelltum okkur svo í vikuferð til Tyrklands til að hvíla okkur á húsbyggingunni, það var voðalega ljúft (kannski aðeins í heitara lagi en alveg viðráðanlegt).

Á meðan við vorum úti þá tók Grímur sig til og stækkaði dyraopið inn í hjónaherbergið, það er eina dyraopið í steyptum vegg hjá okkur (fyrir utan útidyrnar í þvottahúsinu) og það var af einhverjum ástæðum aðeins og lágt (gólfið of hátt). Við höfðum nú hugsað okkur að minnka hurðina bara aðeins að ofan og neðan en Grími líkaði sú ráðstöfun illa, hann laumaðist því til þess að brjóta úr dyraopinu meðan við hvíldum okkur í Tyrklandi.

Við erum svo flutt inn að nafninu til, vegna gestagangs á Marbakkanum um verslunarmannahelgina þá hröktumst við í okkar eigið hús og höfum verið þar síðan (ef frá er talin Tyrklandsförin). Ekki erum við nú búin að flytja mikið af búslóðinni til okkar enda er húsið vart tilbúið fyrir svoleiðis. Við unum okkur þó ágætlega í einu herbergi enda er eldhúsið klárt, gestabaðið, sturtuklefinn og baðkarið.

En... það er víst nóg eftir og við verðum víst ekki verkefnalaus á næstunni.

Flís við rass

Klósettkassinn á efri hæðinni var flísalagður í gær, stefnt er að því að fúga hann í kvöld og setja svo upp klósettskálina (eins gott að hafa það í lagi fyrir partý).

Annars tafðist flísa- og parketlögn um nokkra daga vegna klúðurs hjá Landflutningum. Við erum búin að hringja daglega í Húsasmiðjuna á Egilsstöðum til að reka á eftir flísunum og parketinu á eldhúsið, þeir sögðust svo hafa skilað því af sér, til Landflutninga á mánudaginn. Ekkert barst þó til okkar. Við grunuðum auðvitað Húsasmiðjuna um að hafa ekki komið þessu frá sér (af fenginni reynslu) og hringdum enn og aftur en þeir stóðu fast á því að hafa komið þessu á bíl. Á miðvikudag (og enn ekkert komið) hringdum við svo í Landflutninga á Egilsstöðum, þá voru þeir búnir að tína brettinu en lofuðust til að leita. Þeir fundu það svo að lokum í Reykjavík !!! höfðu skellt því upp í vitlausan bíl á Egilsstöðum (þessir Héraðsmenn, ég segi ekki annað ;-). En þetta skilaði sér loksins í gær og vonandi náum við að koma pleisinu í partýhæft ástand.

Grímur er búinn að vera að setja upp innihurðir og nú eru komnar hurðir fyrir klósettdyrnar uppi og niðri auk eins herbergis, þannig að nú er að verða íbúðarhæft.

Parketið á eldhúsið fer á í dag, og þá getum við sett ísskápinn á sinn stað (til að kæla bjórinn).

Svo er mæting í partý á laugardagskvöldið kl. 21.

Parketlögn hafin

Við höfum verið iðin við kolann síðustu daga.

Eldhúsinnréttingin er komin upp að undanskildum nokkrum skúffuframhliðum sem eru ekki enn komnar frá IKEA. Grímur er búinn að koma niður baðkarinu og er byrjaður á sturtuklefanum. Búið er að leggja rafmagn að og tengja alla tengla í eldhúsi og einu herbergi. Um helgina parketlögðum við Hrönn eitt svefnherbergi og fataherbergið.
Við stefnum enn ótrauð að því að halda "innflutnings"partý um verslunarmannahelgina, ekki verður þó gerð krafa um að gestir fari úr skónum.
Von er á flísum og parketi í eldhúsið á dag eða morgun þannig að vonandi verður orðið partýhæft um næstu helgi.

Innréttingavinna hafin

Málararnir kláruðu sinn skammt í gær, fullmáluðu loftin og grunnuðu veggina.
Innréttingarnar frá IKEA komu líka í gær og skrúfaði ég saman fyrsta skápinn í gærkvöldi. Það verður nóg að gera næstu daga, mála eina umferð á alla veggi og setja saman innréttingar. Svo ætla ég rétt að vona að pípararnir fari að standa við loforðin og komi að tengja gólfhitann.
Nú er sem sagt lokaspretturinn að hefjast, ég ætla mér að vera í fríi eftir hádegi og vinna í húsinu á fullu og svo er bara að vona að við getum staðið við loforðin um innflutningspartý um verzlunarmannahelgina.

Ég reyni að koma inn nýjum myndum fljótlega.

Sparslað og málað

Frekjan hún systir mín heimtaði frekari fréttir þannig að ég verð að verða við því.

Nýlegar myndir eru ekki tiltækar en hér kemur ein sem er ekki mjög gömul sem tekin er úr sunnverðri stofunni, eldhúsið er vinstra megin en hægra megin eru dyrnar úr andyrinu inn í stofuna.


Önnur mynd kemur svo hér af hnúfubak sem lék listir sínar fyrir okkur í björgunarsveitinni þegar við héldum fjölskyldudag í Hellisfirði á þjóðhátíðardaginn.


Af húsbyggingunni er það helst að frétta að allir milliveggir eru komnir upp og klæddir. Málararnir eru búnir að vera í nokkra daga að sparsla og munu þeir grunna veggi og mála loft, það ætti að klárast í næstu viku. Enn bíðum við eftir pípurum til að tengja gólfhitann og neysluvatnið en ég hef verið að draga rafmagnsvírana í og er það langt komið á neðri hæðinni en á efri hæðinni eru bara komnar "rússneskar ljósakrónur".

Erum flutt !

... ekki þó í nýja húsið, heldur til Gríms og Sýbillu. Íbúðin sem við vorum í á heimavist Verkmenntaskólans breytist á næstu dögum í hótel þannig að okkur var úthýst.
Nú er komin pressa á Grím að hjálpa okkur að klára svo hann losni við okkur út aftur.

Hákon er á fullu að vinna í húsinu, milliveggir eru langt komnir, efri hæðin ætti að klárast í dag eða á morgun. Þá er komið að málurunum á efri hæðinni, það þarf að sparsla og grunna þetta allt saman.

Set inn myndir bráðlega.

Og áfram með smjörið

Sælir lesendur góðir, maður er svo upptekinn í byggingu að maður má ekkert vera að því að setja eitthvað hér inn, en hér kemur eitthvað smávegis.

Nú er búið að leggja í gólfin á neðri hæðinni.

Hákon hefur svo verið að vinna hjá okkur við að gifsklæða útveggina


Sérfræðingarnir að sunnan (þeir sem reistu efri hæðina) eru svo mættir aftur og eru að klæða neðri hæðina að utan.


Við erum líka byrjuð að reisa milliveggjagrindur á neðri hæðinni og rafmagn og vatn er komið inn í húsið (alls ótengt ennþá reyndar en það er allt í vinnslu)

Ýmislegt hefur gerst síðan síðast

Afsakið hlé.

Ýmislegt hefur verið gert síðan ég reit síðast á þessa síðu. Við byrjuðum til dæmis að leggja rafmagnsrör og -dósir í steyptu veggina á neðri hæðinni. Einnig byrjuðum við á veggklæðningunni niðri.

Síðan var hafist handa við að leggja gólfhitalagnir (einangrunarmottur og rör) og nú í dag var svo "lagt í" (steypt ofan á) gólfið á efri hæðinni.

Loftklæðning og milliveggir

Páskafríið er nýtt til hins ítrasta til smíða og nú er búið að klæða loftið og slá upp milliveggjagrindum komnar upp á efri hæðinni.

Raflagnir og gifs í loft

Undanfarið höfum við verið að vinna við að setja upp raflagnadósir og rör. Á þriðjudaginn settum við svo fyrstu gifsplöturnar í loftið á bílskúrnum. Næstu verkefni eru áframhaldandi raflagnavinna og gifsklæðning í bílskúr.

Lagnagrind í loft

Það sem unnið hefur verið við síðustu daga er að koma fyrir lagnagrind í loftið. Það er langt komið og er þá næsta verk að ganga frá raflögnum í loftið.

Búið er að einangra allt og klæða loftið með rakavarnardúk (rakasperru).

Hér er mynd frá einangrunarvinnunni.

Innivinnan tekin við

Nú er innivinnan tekin við og þær stórstígu breytingar sem sést hafa á útliti hússins eru búnar í bili, nú erum við að einangra loftin á efri hæðinni og að klára svokallaða raflagnagrind innan á veggjunum.
Grímur og Bryndís hafa hjálpað okkur við einangrunarvinnuna.

Fokhelt

Nú er húsið orðið fokhelt, þvottahúshurðin fór á sinn stað fyrir helgina og bílskúrshurðin er orðin lokuð (enn er reyndar ekki hægt að opna hana með góðu móti, en það er í vinnslu).
Á laugardaginn týndum við svo allt lauslegt timbur saman og stöfluðum upp. Það ætti því ekkert að vera byggingarfulltrúanum að vanbúnaði að gefa út fokheldisvottorð.
Nú er innivinnan tekin við og ætlum við að reyna að sinna henni að miklu leyti sjálf - það mun koma í ljós hvernig það gengur. Næstu verkefni eru að ganga frá raflagnagrind á veggjum, einangra loftið og koma fyrir raflagnagrind þar líka.

Fullfrágengið að utan (efri hæðin)

Nú er efri hæðin orðin fullfrágengin að utan, bílskúrshurðin er komin í (að nafninu til) og Viðarsteinn ehf. búnir að ljúka sínu verki. Smiðirnir fara heim á morgun og þá er ég tekinn við stjórninni þarna.
Þvottahúshurðin verður svo vonandi sett í á næstu dögum og þá er húsið orðið fokhelt.

Að verða tilbúið að utan

Nú er efri hæðin að verða fullfrágengin að utan. Það klárast í vikunni.
Búið er að klæða allt þakið, það vantar reyndar enn þak á útskotið í stofunni (klárast í dag).
Þakkantur er kominn á 3/4 og þakrennur.
Klæðning er komin á alla efri hæðina nema upp í mæninn á suðurhliðinni og búið er að ganga frá listum í kringum flesta glugga og flest horn.

Klæðningin

 

Áfram með smjörið

Þessa dagana halda smiðirnir ótrauðir áfram við sitt verk. Nú er verið að klæða efri hæðina og er norðurhliðin búin og austurhliðin langt komin.
Norðurhlið bílskúrsþaksins er líka orðin fullfrágengin og verið er að vinna í þakköntum.
Ég vonast til að síðustu plöturnar á þakið og þakgluggarnir í eldhúsinu fari á sinn stað á morgun.
Smiðirnir ætla svo að taka sér frí um næstu helgi og skreppa suður að heilsa upp á frúrnar.

Nýjar myndir á myndasíðu

Slatti af nýjum myndum á community.webshots.com/user/sveinnh/

Byrjað að klæða húsið að utan

Smiðirnir eru byrjaðir að klæða húsið að utan, með þessum sérstaklega fallega "country red" lit. Á hornum verða hvítir listar og einnig í kringum glugga.

Reisugilli, kverkarnar vættar

Við héldum svo át- og drykkjuveislu fyrir smiðina.

Siggi, Jón Ben og Peter

Jason

Reisugilli

Þegar sperrurnar voru komnar upp var flaggað. (19.jan.2006)

Það hefur aldrei orðið svo hvasst að það hafi ekki lægt aftur.

Ég var reyndar farinn að efast um þetta á tímabili í gær þegar vindhraðinn fór upp í 45 m/s í hviðum skv. sjálfvirkum mæli Veðurstofunnar.
Hálfuppsetta húsið okkar fékk því aldeilis prófraun strax daginn eftir að veggirnir voru settir upp. En það stóðst þetta, þannig að ég reikna með því að við getum treyst því að þetta hús standist flest veður.

Í dag voru sperrurnar svo hífðar á sinn stað og festar. Þannig vildi til að við fengum kranamann ekki nema í tæpa tvo tíma í morgun (fengum að hafa kranann í allan dag) og eftir nokkra árangurslausa leit að hæfum kranamanni sá ég fram á það að neyðast til að gera þetta sjálfur. Þetta gekk allt stóráfallalaust fyrir sig, enda er ég nú næstum því með próf á bílkrana (a.m.k. bóklegt).

En sperrurnar eru sem sagt komnar upp og húsið farið að taka á sig mynd.
Talandi um myndir, þá fylgja nokkrar hér með, og svo bendi ég á myndasíðuna mína: community.webshots.com/user/sveinnh/ þar er albúm sem kallast húsbygging.

Einingarnar komnar á sinn stað

Það gekk ágætlega að koma einingunum fyrir. Það varð ekki svo hvasst á meðan á því stóð.

Nú spáir norðvestan 25 m/s þannig að nú er eins gott að þetta sé vel fest saman hjá smiðunum.

Húsið farið að rísa

Nú er allt að gerast.

Á laugardaginn komu smiðir að sunnan og byrjuðu á því að taka út úr gámnum. Út úr honum komu einingarnar í húsið ásamt fleiru.

Á sunnudaginn unnu þeir svo við að koma fyrir "fótreiminni", þ.e. plönkum sem leggjast ofan á gólfplötuna og einingarnar leggjast svo ofan á.

Í dag er svo verið að hífa einingarnar á sinn stað. Það hófst um hádegi í ágætis veðri, litlum vindi en kólnandi (eftir rigningu morgunsins). Nú er aftur á móti farið að hvessa og er það ekki alveg besta veðrið í svona vinnu. Ég vona bara að þetta klárist áður en það hvessir meira.

Ég reyni að koma inn myndum í fyrramálið.

Plötu haldið heitri

Síðustu daga hefur verið kynt vel á neðri hæðinni hjá okkur til að halda loftplötunni frostfrírri, það virðist hafa gengið ágætlega, a.m.k. bráðnaði snjórinn af plötunni (ofan af yfirbreiðslunum) þó að nokkurt frost væri.

Í dag er svo hlýrra þannig að ekki þarf að kynda í dag. Á morgun gæti svo fryst aftur en það er spurning hvort ekki er nógu langt um liðið síðan steypt var, þannig að óþarfi sé að kynda.


Kynt hefur verið með gasofni, steinolíuofni og "master"-blásara (steinolía og rafmagn).

Gólfplata efri hæðar steypt

Í gær (9.janúar 2006) var gólfplata efri hæðarinnar steypt. Undirbúningur þess hefur staðið síðustu vikur. Það gekk vel og "glattaði" Þorvarður múrarasonur fyrir okkur bílskúrsgólfið, því verki lauk klukkan 6 í morgun. Bílskúrsgólfið ætti því að vera tilbúið og frágengið, enda voru lögð í það hitarör þannig að ekki þarf að leggja í það aftur þeirra vegna.

Nú er bara að vona að frost næstu daga eyðileggi ekki steypuna. Verið er að plasta fyrir glugga á neðri hæðinni og koma fyrir hitunartækjum til þess að freysta þess að hægt verði að hita neðri hæðina nógu vel upp til að platan haldist frostfrí.

Fyrri gámurinn með húsinu frá Kanada kom á staðinn í dag, þannig að nú fer vonandi að líða að því að efri hæðin rísi. Smiðir koma líklega fyrir helgina til að reisa húsið.

Frágangur loftplötu

Nú er unnið á fullu við frágang og járnabindingu á gólf/loftplötunni. Raflagnateikningar voru að berast þannig að nú komast rafvirkjarnir vonandi fljótlega í að leggja rör milli rafmagnsdósanna sem komu í forsteyptu plötunum. Pípararnir þurfa svo líka að leggja neysluvatnslagnir í plötuna.

Ég er að vonast til að geta steypt plötuna sem fyrst í næstu viku.